SPORTS News —- Magahalin eon ro Alaska Aces sa Philippine Basketball Association (PBA) matapos ro 36 anyos ukon masobra sa tatlong dekada nga pagpasakop sa liga.
Gin-obra it Aces ro makakilibot nga anunsiyo makaron nga Miyerkules ag ginhambae nga magahalin eon sanda ag pagatapuson eon ro makolor nga 36 anyos sa liga kun sa siin nagdaog ro koponan it pilang mga titulo.
Sa pihak kara, ginklaru ni team governor Dicky Bachmann nga pagatapuson gihapon nanda ro nagapadayun nga PBA Governors’ Cup, kun sa siin presenteng una sa ika-6 nga pwesto ro Aces nga may 3-2 win-loss card.
Ro Alaska hay sambilog sa mga pinakamayad nga club sa liga.
Nagdaog raya it kabilugan nga 14 nga kampeonato, kaibahan eon ro sangka tumaeagsahon nga grand slam feat ko 1996 sa idaeum it pagdumaea it batikang head coach nga si Tim Cone.
May una man raya nga 31 finals appearances ag nakahimo it pilang basketball legend kapareho nanday Johnny Abarrientos, Jojo Lastimosa, Jeff Cariaso, ag Sonny Thoss.
