KALIBO, Aklan—Ginbatikos it Alliance of Concerned Teacher ukon ACT ro Department Order 49 it Department of Education ukon DepEd.
Suno kay ACT Secretary General Raymund Basilio nga raya hay matsa sangka pamaagi nga tabunan ro baba it mga teachers sa pagpaabot it andang mga sentimiento ag mag-organisa.
Ginpahayag dugang nga ginabo-oe kara ro andang kinamatarung nga maghambae.
Sa idaeum it nasambit nga mandu, ginabawaean ro mga empleyado it DepEd ag mga opisyal nga mag-post online it andang mga pag-atake kontra sa kaparehong DepEd employees.
Ginsuhestiyon ni Basilio nga kinahangean nga ayuson it ahensiya ro andang grievance mechanism agud nga insigidang maaksyunan ro andang ginapaabot nga reklamo.
Nagapanguna sigon nga concern makaron it mga manugturo hay ro workload ag kakueangan it bastanteng gamit sa eskwelahan rason nga napilitan sanda nga mag solicit ukon maggastos it kaugalingon nga kwarta.
Sa pihak nga parte, ginpahayag ni Basilio nga magiging maugan para kanda ro andang trabaho matapos nga ibawae it DepEd sa idaeum it DO 49 ro pag angkon it komunikasyon sa tunga it teacher ag estudyante sa social media.
Raya hay matapos nga haeos daywang dag-on nga gingamit ro social media sa distance learning nga nagpadayun hasta sa makaron bangud sa pag angkon it mga group chat.
