KALIBO, Aklan—Magapangatubang sa kasong pag-eabag sa Presidential Decree 1602 ukon Illegal Cockfighting Law ro an-om ka mga indibidwal matapos nga madakpan sa illegal nga tupada sa Sitio Malabonot, Brgy. Manoc-manoc sa isla it Boracay.
Ginkilaea ro mga naaresto nga sanday Francisco Ramos, 56-anyos; Ronald Nadura, 44-anyos; Kevin Bernardo, 25-anyos; Esonjohn Taytay, 48-anyos; Pedro Casimero, 36-anyos ag Jano Palacio, 32-anyos ag parehong residente it nasambit nga lugar.
Ro an-om hay naaktuhan nga nagapatigayon it pagbueo bueo kon siin nabueo sa andang posisyon ag kontrol ro waeong bilog nga pambueang nga manok nga ginakaeakipan it an-om nga patay ag daywa ro buhi.
Mag-eowas kara, nabueo man kanda ro kapin sa P600 pesos nga kantidad it kwarta nga ginamit bilang taya.
Ro an-om hay insigidang gindaea sa Boracay Police Station kon siin sanda sa makaron nakakulong para sa nagakaigong disposisyon.
