KALIBO, Aklan— Maskin nga padayun nga nakasarado sa mga turista, nakasueod gihapon ro Isla it Boracay sa 30 “Best Islands in the World: 2018 Readers’ Choice Award” it Conde Nast nga ginpaguwa ko Oktubre 9.
Makaron nga dag-on hay gintunga it sikat nga Travel Site ro 30 awardee sa mga rehiyon: “the best in Asia, Australia and the South Pacific, Caribbean and the Atlantic, Europe, North America, and best in the rest of the world.”
Sa Asya, pangaywa ro Boracay.
Nakasueod man sa top three it rehiyon ro daywa pang Isla sa Pilipinas nga ginaeakipan it Siargao nga nagpanguna makaron sa listahan ag ro Palawan nga pangatlo.
Pang-ap-at ro Langkawi, Malaysia ag panglima man ro Bali, Indonesia.
Nasambit man sa report nga bangud sa overcrowding ag owa na-kontrol nga development rason nga ginpasarado ro Isla sa sueod it an-um nga buean umpisa ko Abril 26 agud nga ipaidaeaum sa rehabilitasyon .
Makaangkon it dry run sa pagbukas it Boracay sa Oktubre 15 hasta 25 ag ro soft opening hay sa Oktubre 26.
