KALIBO,Aklan– Apisar nga napas-eawan nga makasueod sa semifinal round hay raya gihapon ro best finish it Gilas Pilipinas women’s team sa FIBA Women’s Asia Cup matapos ro promosyon ko 2015.
Raya hay matapos nga naeansang ro koponan sa ika an-om nga pwesto kasunod it pagkapyerde sa South Korea sa score nga 80-71 sa classification match nga ginpatigayon sa Sydney, Australia.
Panan-awan ni Bombo International Correspondent Denmark Suede it Sydney, Australia nga mahilig ro mga Pinoy sa hampang nga basketball apang ro bola hay uwa haeos nakipagbagay kanda.
Pila sa mga factor nga ginatan-aw hay ro kueang sa height it mga Pinoy.
Sa natapos nga hampang, ginpangunahan ni Afril Bernardino ro team nga may 16 points samtang sanday Jack Animam ag Khate Castillo hay may 12 points kamana man si Vanessa de Jesus nga nag-amot it limang puntos.
Madumduman nga ro Pilipinas hay nagtapos sa ika-pito nga pwesto ko 2015, 2017, 2019, ag 2021 editions it Women’s Asia Cup.
Samtang, uwa man nadismaya si head coach Pat Aquino sa andang pagkapyerde bangud sa nasambitang hampang hay nagapakita eamang nga masarangan eon nandang makipagsabayan sa mga mabaskog nga koponan.
