KALIBO, Aklan–Ginaplantsa eon it Aklan Police Provincial Office ukon APPO ro andang igapatuman nga semi-major sa nakataeana nga pag-host it Aklan sa Western Visayas Regional Athletic Association ukon WVRAA Meet sa maabot nga Abril 26 hasta 30.
Suno kay P/Staff Sgt. Jane Vega, Assistant PIO it APPO nga magataeana sanda it mga task units agud nga mabantayan it husto ro daeagan it trapiko, seguridad sa venues ag billeting quarters it mga atleta, coaches ag mga sports officials kamana man ro convoy sa mga maga abot nga mga matag-as nga opisyal.
Ginpasiguro man nana nga haum ro mga kapulisan eabi eon ro mobile force company sa Aklan sa pagbuyot it pinakamabahoe nga sporting event sa western visayas bangud nga nakasanayan eon nanda ro pag-host it aklan it mga daeagkuan nga event.
Madumduman nga owa nadayun ro pag-host it aklan sa WVRAA ko 2020 bangud sa pagtama it COVID-19 pandemic.
Sa makaron suno kana hay owa pa sanda nakabaton it imbitasyon halin sa department of education para sa coordinating conference.
Ro Aklan Sports Complex sa Barangay Calangcang, Makato ro magiging venue it opening ceremonies.
Mag-eowas sa makato, pila pang banwa ro posibleng maga-host it mga delegado hay ro Kalibo, Lezo, Numancia ag Malinao.
