KALIBO, Aklan—Bilang suporta sa kampanya it Philippine National Police kontra sa loose firearms, nagapadayon ro inisyatibo it Aklan 2nd Police Mobile Force Company pinaagi sa andang programa nga “Armas Baylo Bugas”.
Sa kamatuoran suno kay P/Lt.Col. Donnel Regis it Aklan 2nd PMFC, ko nagtaliwan nga dag-on 2024, kapin sa 24 nga firearms ag 4 nga explosive device ro boluntaryong naipasaalima kanda it mga nagahupot kara nga indibidwal.
Samtang, sa pag-arangkada it mga unang buean it dag-on 2025, nakabaton eon sanda it 3 firearms ag sangka explosive device halin sa mga indibidwal nga boluntaryong nagsurender kanda it nasambit nga armas.
Ginpahayag dugang ni P/Lt.Col. Regis nga naging posible ro andang mga operasyon sa mga nabukid nga parte it mga kabanwahanan nga andang nasakupan bangud sa information dissemination sa publiko matapos nga ginapasiguro it mga raya nga pagataguon ro andang identity ag inde sanda pagpasakaan it kaso.
Mag-eowas kara, may kabaylo pa nga sangka sako it bugas nga kapin sa 25 kilos.
Ginpasiguro man ni P/Lt.Col. Regis nga nagapadayon ro andang pagbantay sa komunidad agud nga uwa it makaeosot nga mga law less element para sa kaeowasan ag seguridad it publiko.
