Ginpamalibaran ni dating presidential spokesperson Atty. Harry Roque ro makaron hay nagakalhit nga impormasyon nga ginbasura sigon it nasyong The Netherlands ro anang asylum application.
Sa pahayag, anang ginpamailit nga uwa it kamatuora ro ginhambae ni Department of Justice Secretary Jesus Crispin Remulla sa ginapatihan karang ‘denied’ ro anang aplikasyon. Pangaywa eon sigon raya it nasambit nga opisyal pati man ro anang hinambae nga may una man imaw nga ‘multiple passports’. Kaya ginkabig nana rayang mga impormasyong ‘denied’ ro anang aplikasyon nga sangka klase eamang it ‘fake news’ ukon maling balita kun siin ginpamilit pa it nasmabit nga abogado nga uwa nana raya ginkakibot eabi eon sa idaeom it presenteng administrasyon.
Dugang pa ni Atty. Harry Roque nga imaw hay paadto eamang sa nasyong Germany para sa sangka aktibidad kaibahan ro pilang mga kababayang Pilipino.
Nakabalik eon man sigon imaw sa The Hague, Netherlands nga anang ginadayunan samtang uwa sa Pilipinas.
Ginpamilit pa nana nga bukon man sigon kinahangean pang usuyon ukon sayuron ro anang lokasyon bangud sa ginbulgar ag ginsapubliko man nana raya.
