BALITANG Espesyal —- Maabu ro nangawa sa proteksiyong daea it bag-ong style it face mask nga nauso makaron sa South Korea bangud nga ilong eamang ro ginatakpan kara.
Ro tawag sa bag-ong klase it face mask hay “Kosk”. Raya hay kombinasyon it Korean word nga “Ko” nga ro buot hambaeon hay ilong ag English word nga “Mask”.
Himo ro nasambit nga face mask it kompanyang Atman ag gindisenyo nanda para sa mga tawong gustong magkaon sa mga restaurant apang gustong proteksiyunan ro andang ilong sa COVID-19.
Ro Kosk ro pinakaunang nose-only face mask ag napukaw kara ro atensiyon it Western media nga nagahambae nga owa raya it ginatuga nga proteksyon sa mga nagasuksok kara.
Apang suno sa Chairman in Epidemiology it Deakin’s Institute for Health Transformation nga si Professor Catherine Bennett, indi dapat ismolon ro proteksiyon nga ginatau it Kosk bangud nga may maibulig man raya maskin paalin bangud nga ro ilong ro pinakamadaling entryway it coronavirus.
Maskin nga maabu nga taga-Western countries ro nagabatikos sa Kosk, madaog raya sa South Korea ag may 5-star rating raya sa South Korean shopping app nga Coupang.
Sa makaron hay nagabalor it 9,800 Won ukon katumbas it 420 pesos ro napueong bilog it Kosk.
