KALIBO, Aklan—Haom eon ro Batan Municipal Police Station sa pagsikyar sa seguridad it mga bisita ag deboto nga ginaeaumang makipagbahin sa Malakara ag Ati-Atihan Festival 2023 sa banwa it Batan.
Suno kay P/Capt. Gerly Mae Lapasaran, acting chief of Police it Batan PNP Station nga preparado eon sanda sa pagbantay ag pagmonitor sa palibot para sa selebrasyon it kaugalingon nga bersyon it Ati-Atihan festival sa nasambit nga banwa.
Sa adlaw it Sabado, Enero 14 hay ro Malakara Festival ukon ro modern Ati kon sa siin ginashowcase sa competition nga pagapasakupan it nagkaeain-eain nga tribu ag grupo ro modern costume.
Samtang, sa adlaw it Dominggo mat-a Enero 15 hay ro balik Ati competition kon sa siin igapaguwa mat-a dikara it mga partisipante nga tribu ag grupo ro native custome.
Kapin sa 90 hasta 100 ka mga awtoridad nga ginakaeakipan it PNP uniformed personnel ag force multipliers ro nakakalhit makaron sa banwa it Batan partikular sa festival zone agud nga magsikyar it seguridad para maangkon ro malinong ag matawhay nga pagselebrar it okasyon.
