Naging madinaeag-on ro daywang adlaw nga nationwide transport strike it grupong Manibela ag PISTON agud nga maipaabot sa gobyerno ro andang hinaing angot sa sunod-sunod nga pagtaas it presyo it produktong langis sa nasyon.
Suno kay No To PUV phase out coalition ag Bayan-Panay secretary general Elmer Forro, nakit-an nanda nga maabo ro nakipagbahin sa andang kawsa makaron kon ikumpara ko nagtaliwan nga dominggo nga pagpatigayon man it transport strike.
Ginpahayag ni Forro nga sa sigidas nga pagtimbook it presyo it langis hay naga-aray eon ro mga drivers and operators bangud sa kawad-an it kita ag sa kapiranggot nga subsidiya it gobyerno nga ginakabig nga band-aid solution sa maeapnagong krisis.
Sa kamatuoran suno kana hay maabong jeepney driver ro uwa eon nagbyahe bangud sa bukon eon it bastante ro andang ginakita para sa pang adlaw-adlaw nga gaeastuson it andang bilog nga pamilya.
Eubus nga apektado suno kana hay ro sektor it transportasyon ag ro mga minimum wage earners nga adlaw-adlaw nga naga-commute agud nga makasueod sa andang tagsa ka trabaho.
Panawagan gihapon nanda sa gobyerno ro madaliang aksyon sa pagrepaso sa Oil Deregulation Law kaibahan eon ro pagsuspinde sa Fuel Excise Tax ag Value Added Tax para sa paghagan-hagan it presenteng sitwasyon.
