KALIBO, Aklan—Nag-apela sa gobyerno ro Boracay Foundation Incorporated (BFI) nga dueaon eon ro age restrictions agud nga uman nga mabuhi ro turismo sa isla it Boracay.
Suno kay BFI president Edwin Raymundo, ro ginasaligan sigon nanda nga mga bakasyunista hay ro magpamilya ag bukon it solo travelers rason nga malisod para kanda nga abuton ro 50 porsyento nga kapasidad.
Sa sueod it 15 diyas suno kana halin kat ginbuksan ro isla sa mga lokal nga turista it Western Visayas ko Hunyo 16 hay nag-average eamang sanda sa 32 rooms ukon 2 rooms per day ro booking sa mga accredited hotels and resorts.
Sa 140 nga mga member establishments nga gintaw-an it awtoridad nga magbukas hay 34 eamang ro naglakas loob nga nag-operate it uman it andang negosyo.
Kon maduea eon sigon ro age restrictions hay posible nga magataas eon ro tourist arrival sa isla bangud nga inde man pag-aywanan it mga ginikanan ro andang mga onga para eamang sa bakasyon.
Ginpasiguro man kara nga eowas ro tanan nga travelers bangud nga strikto nandang ginpatuman ro mga health protocols kontra sa Covid-19 pandemic.
Sa makaron suno kana hay nagaeaum sanda nga sa uman nga anunsyo it gobyerno hay mas pang haeogaan ro quarantine sa Aklan ukon mas mayad nga maadto eon kita sa new normal agud nga uman nga mabuhi ro ekonomiya it probinsya.
