KALIBO, Aklan—Ginapadahan it Bureau of Fire Protection ukon BFP-Malay ro publiko kontra sa pilang mga indibidwal nga ginagamit ro pangaean it andang taeatapan sa pagbaligya it fire extinguisher.
Suno kay FO1 Teody Mark Emilia it BFP-Malay nga nasayuran nanda ro impormasyon matapos nga may sangka establisimento komersiyal sa Brgy. Manocmanoc sa isla it Boracay ro nagpahisayod kanda angot sa insidente.
Modus sigon it mga suspek nga naga agto sa mga establisimento ag nagapakilaea nga mga tawuhan it BFP agud nga magpatigayon it inspection.
Kasunod kara hay ro andang pagrekomenda nga magbakae kanda it bag-ong fire extinguisher bangud nga expired eon ro andang ginahuptan.
Gin abisuhan pa sigon sanda nga iga-deliver ro andang ginbakae nga fire extinguisher pagkatapos nga makabayad.
Samtang, ginpamalibaran ni FO1 Emilia nga may kahilabtanan ro andang opisina sa mga owa nagpakilaeang indibidwal.
Bangud kara, insigida man sanda nga nagpaguwa it advisory agud nga mataw-an it nagakaigo nga paandam ro publiko.
Angot kara, ginpahayag ni FO1 Emilia nga padayun ro andang balidasyon sa nasambit nga impormasyon bangud nga owa nanda naabutan ro mga suspek sa pagresponde sa lugar.
Dugang pa nga posibleng ro nasambit nga modus hay agud nga maengganyo ro mga inosenteng tawo nga mabakae ro andang mga baligya nga fire extinguisher kun sa siin puntirya ro mga establisimento komersiyal ag mga may ikasarang sa kabuhi.
