KALIBO, Aklan—Ginpahayag ni Boracay Inter Agency Rebalitation Management Group (BIARMG) general manager Natividad Bernardino nga “in place” eon ro tanan para sa soft re-opening it isla it Boracay makaron nga adlaw, Hunyo 16.
Suno kana, haom eon ro tanan nga staff it lokal nga gobyerno it Malay nga mag-abibar ag magbaton sa mga lokal nga turista nga magahalin sa mga kaeapit nga probinsya sa bilog nga Western Visayas.
Ro makit-an sigon nga scenario hay ro kaparehas ko una nga ginbuksan ro isla matapos ro an-om nga buean nga closure kon sa siin paga-usuyan ro mga raya it identification card ag booking document sa accomodation establishment nga nataw-an it certificate of authority to operate.
Ginpahayag dugang ni Bernandino nga uwa man ginaeauman ro pagdagsa it mga turista bangud nga haeos tanan hay uwa pa nagakumpyansa tuga it Covid-19 pandemic.
Apang, manami sigon raya nga senyales bangud nga amat-amat nga mabuhi ro industriya it turismo sa Aklan.
Ginpasiguro man kara nga hugot nga igamonitor ro mga health protocols nga ginapasunod it BIATF agud nga malikawan ro sakit nga Covid-19.