KALIBO, Aklan — Nakaangkon it bueawan nga medalya ro Boracay Dragons Team Philippines nga nagpasakop sa open division World Flying Disc Federation 2024 Asia Oceanic Beach Ultimate Championship sa Shirahama, Japan.
Suno kay Malay Sangguniang Bayan member Datu Yap Sumndad, miyembro it Philippine team nga nagpasakop sa beach frisbee tournament nga makabig nanda raya nga back to back championship.
Nadepensahan nanda ro titulo sa open division kat piyerdihon ro host team nga Japan sa score nga 13-8.
Kabilugan nga tatlong gold medal ro ginhakot it Pilipinas ultimate teams sa bag-o eamang natapos nga torneo.
Kampeon man ro Philippine Binibinis sa womens division kontra Japan, 13-6.
Naeampasan nanda ro naangkon nga bronze medal ko 2019.
Gold medal man ro gin-uli it Pilipinas sa mixed division kasunod it 12-9 win sa finals kontra sa India.
Kaibahan pa sa mga nasyon nga nagpasakop hay ro Australia, Singapore, South Korea, ag iba pa.
Mag-eowas kay SB member Sumndad, kaibahan pa sa Boracay-Malaynon Atheletes sanday Joebert Buenaventura, Alled Jay “Kano” Libo-on, John Manuel “Nonoy” Sacapaño, Paul Richie “Paopao” Mariano, ag Michelle “Panoy” Delos Santos.
