KALIBO, Aklan — Nagpresintang maga bulig ro Boracay Filipino Chinese Association sa pagkay-ad sa isla it Boracay bangud sa mga problema kara sa drainage system ag waste water management.
Sa interview it Bombo Radyo Kalibo, gin pahayag ni Thomas Santiago, Presidente it Boracay Filipino Chinese Association nga haum sanda nga magtao it bulig para sa rehabilitasyon ag pag usoy it solusyon agud maayos ro isla sa nakataeanang pagpasara kara sa Abril 26, 2018.
Suno kay Santiago, may una sandang mga inisyatibo ag pamaagi agud makabulig nga indi ipasara ro Boracay kapareho it paggamit it teknolohiyang mas mapadali ro paglimpiyo it tubi sa isla.
Suno pa kana nga raya hay sangka powder nga iga butang sa drainage nga may mahigkung tubi ag makataliwan ro pilang adlaw hay pwede eon nga maipagowa ro tubi sa eawod.
Gin pahayag dugang pa ni Santiago nga maabong mga nasyun eon ro nagagamit kara nga may kaparehong problema.
May kaangtanan kara, magatao ro andang grupo it proposal sa lokal nga gobyerno it Malay kun siin nakabaehag kara ro teknolohiyang makabulig sa water treatment it Boracay.
