KALIBO, Aklan–Masobra sa 800,000 nga turista ro nag-abot sa Isla it Boracay sa unang an-um nga buean it presenteng dag-on.
Nagatuhaw sa record it Malay Municipal Tourism Office, naga-abot eon sa 849,047 ro mga turistang nagbisita sa isla umpisa Enero hasta Hunyo, 2022.
Sa nasambit nga numero, 817,215 ro domestic tourists; 18,845 ro dumueuong nga turista samtang 12,987 ro overseas Filipino workers ukon overseas Filipinos.
Sa buean it Mayo nakalista it pinakamataas nga numero it mga turista sa tunga it naexperiensiyahan nga pandemya nga may 201,368 bangud sa “LoveBoracay” nga kilaea sa dating pangaean nga LaBoracay.
Raya hay ginsundan it buean it Hunyo nga may 193,650 nga bisita; Abril nga may una nga 186,751 ag 150,597 ko Marso.
Sa mga buean it Pebrero ag Enero nakalista it manabang tourist arrivals nga nag-abot eamang sa 80,882 ag 35,799.
Samtang, ginaeauman nga mas pang magataas ro numero it mga turistang magabakasyon sa Boracay matapos ro uman nga pagbalik it international flights sa Kalibo International Airport ag ginhaeugaan nga travel restrictions.
