KALIBO, Aklan—Ginkalipay it Malay municipal tourism office ro uman nga pagkilaea sa Isla it Boracay bilang nagapangunang isla sa Asya base sa Conde Naste Traveler (CNT) Readers’ Choice Award.
Suno kay Felix Delos Santos, Chief Tourism Operations Officer it Malay Tourism Office nga mabahoe raya nga kadaeag-an sa isla.
Mag-eowas sa Boracay, naangkon man it Palawan ro ika-waeo nga pwesto.
Ginpahayag dugang nga mabahoe ro andang pagpasaeamat sa makarondaya nga mga international awards para sa Boracay nga ginbase sa opinyon ag eksperiensiya it mga travelers halin sa nagkaeain-eain nga parte it kalibutan.
Sa pagbangon sigon halin sa epekto it pandemya, ro andang ginatutukan hay ro pag angkon it kumpiyansa it mga bisita sa eowas ag masoehay nga pagbiyahe.
Ginpahayag pa ni Delos Santos nga ro pagkilaea nga ginatau sa turismo it Boracay hay nagapakita nga raya hay sangka nagapangunang tourist destination nga maka engganyo it mas maabu pa nga mga turista.
Ginkilaea man nana ro pagbueuligan ag pagtingua it LGU-Malay, mga tourism stakeholders ag iba pa sa pag-angkon it nasambit nga award.
Nasayuran nga ko 2012 ag 2015 hay naangkon man it Boracay ro nasambit nga titulo.
