KALIBO, AKLAN — Nakadungka makaron sa kaeawuran nga sakop it isla it Boracay ro barkong panggiyera it Philippine Navy nga BRP Gregorio del Pilar para sa “show the flag” mission.
Suno kay Lt. Commander Eric Ferrancullo, station commander it Philippine Coast Guard (PCG-Caticlan) nga tinotuyo kara nga ipakita ro ikasarang it navy sa pagsabat sa anumang paeag ag terorismo.
Ro flag ship sigon it navy hay may sakay nga masobra sa 100 maritime officers nga nagpatigayon it pagpatrolya sa palibot it isla umpisa kahapon ag sa mga kaiping nga lugar.
Kaparte sigon raya it Maritime Joint Task Force “Area Shield” ag Joint Task Force Protect-Boracay kun siin ro isla hay sambilog sa naga pangunang tourist destination sa bug-os nga kalibotan.
Ro barko hay naghalin sa Davao ag Surigao sa Mindanao bago nagpadueong sa Boracay.
Samtang, gin pahayag ni Ferrancullo nga nataw-an it kahigayunan ro pilang sibilyan nga makasaka ag malibot ro bug-os nga barko.
Nasayuran nga sambilog pang patrol vessel ro iga padaea sa isla bilang kadugangan nga pwersa sa daywa pang barko it navy ro nakabantay idtu.
Mag eowas kara, nakataeana man nga mag abot ro mga navy seals officers nga may bastante nga training sa special operations.
