KALIBO, Aklan—Bukon it pabor si Dr. Philip Ian Padilla, public health expert it University of the Philippines ukon UP-Visayas nga obrahon eon nga optional ro pagsuksok it facemask kon sa guwa.
Suno kana nga kinahangean sa gihapon naton nga padayunon ro pagsuksok it mask bangud nga importante nga makaangkon it proteksiyon sa nagkaeain-eain nga infections kamana man sa nagkaeain-eain nga variants it COVID-19.
Nataeupangdan suno kana nga amat-amat eon man nga nagasaka ro kaso it COVID sa nasyon.
Kadungan kara, gin engganyo ni Dr. Padilla ro publiko nga magsunod sa minimum public health standards eabi eon ro pagsuksok it face masks agud nga mapabilin ro low risk case classification it Pilipinas.
Ginkumbinyo man nana ro iba pang owa it booster shots nga magpabakuna eon bilang dugang nga proteksyon.
Engkaso suno kana nga kon haeos 90% eon ro mabakunahan sa bilog nga kalibutan ag nakapa-booster shots it maskin sambilog eang hay may posibilidad nga magiging endemic eon ro COVID ukon pagakabigon nga matsa ordinaryong trangkaso eon lang.
