KALIBO, Aklan—Nagresume eon ro byahe it commercial flights sa Kalibo International Airport.
Suno kay Civil Aviation Authority of the Philippines (CAAP) Aklan manager Engr. Eusebio Monserate Jr. nga nagkasugot ro mga airline companies nga hueayon ro schedule flights matapos nga sangka flight eamang ro ginapasugtan sa sueod it sang adlaw sandig sa executive order nga ginpaguwa ni Aklan Gov. Florencio Miraflores.
Ro byahe sigon hay Kalibo to Manila vice versa bangud nga uwa pa ginapasugtan ro pag-eopad it mga eroplano sa iba pang probinsya partikular sa mga ginakabig nga mataas ro risgo it Covid-19 infection.
May kaangtanan kara, ginpadumdom ni Monserate ro mga byahero nga magsikyar it nagakaigong dokumento kaparehas it travel authority halin sa PNP ag medical certificate halin sa health center agud nga makapa-book it ticket kamana man inde madelay ro pagbyahe.
Nasayuran nga umpisa makaron nga adlaw, Hulyo 15 hay lifted eon ro moratorium para sa pagpauli it mga locally stranded individual ukon LSI butang nga ginaeauman it pamunuan it paeoparan nga maga-cater eoman sanda it mga LSI.
Apang, nakadepende gihapon sigon raya kon magapaguwa it bag-ong executive order ro gobernador.
