INTERNATIONAL News — Napatay ro Fox News cameraman nga si Pierre Zakrzewski kaibahan ro Ukrainian journalist nga si Oleksandra “Sasha” Kuvshynova sa Ukraine matapos nga ro andang saeakyan hay ma-trap sa sangka sunog samtang nga nagabiyahe.
Base sa report, natabu ro insidente samtang si Zakrzewski, 55-anyos hay naga-report kaibahan ro sambilog pang Fox News journalist nga si Benjamin Hall kat ma-korner sa pag-atake maeapit sa capital nga Kyiv.
Nasayuran nga si Zakrzewski hay beteranong war-zone photographer nga nag-cover it makapilang beses sa mga nagakatabu nga giyera para sa Fox News nga ginaeakipan it Iraq, Afghanistan ag Syria.
Imaw hay nakabase sa London, apang matapos nga magtuhaw ro pagsakop it Russia, idtu eon raya nagatrabaho sa Ukraine umpisa ko Pebrero.
Kapin sa ap-at eon nga mamamahayag ro napatay sa haeos tatlong domingo nga bakbakan.
Ro American filmmaker ag journalist nga si Brent Renaud hay nabaril-patay it Russian forces sa banwa it Irpin sa rehiyon it Kyiv.
Ko Marso 1, napatay man ro Ukrainian camera operator nga si Yevhenii Sakun matapos nga bombahan it Russian forces ro television tower sa Kyiv.
