Ginpahayag it China Coast Guard (CCG) nga ginkwestyon ag ginsubaybayan sigon kara ro supply mission it barko it Pilipinas sa Ayungin shoal ukon ginatawag it China nga Second Thomas Shoal.
Sa sangka statement, ginpahayag it CCG nga ginsugtan sigon kara ro civilian vessel it Pilipinas para magdaea it mga suplay sa barkong pandigma nga iligal nga ginsad-sad sa Ayungin shoal.
Ginengganyo man it CCG ro Pilipinas nga makipagbuligan sa China para mabantayan ro maritime situation.
Nauna man nga ginreport it Armed Forces of the Philippines (AFP) kahapon, adlaw it Huwebes, nga madinaeag-on nga nakumpleto ro rotation ag resupply (RoRe) mission sa BRP Sierra Madre sa Ayungin shoal ku Abril 9 kadungan it ika-83 anibersaryo it Araw ng Kagitingan.
Ginpatigayon ro RoRe mission sa pakikipagbueuligan it Philippine Coast Guard ag natapos nga uwa it anumang untoward incident. Raya eon ro ika-pitong sunod nga resupply mission nga nakumpleto nga uwa it interference umpisa ku Hulyo.
Madumduman abi nga sa nagtaliwan nga dag-on, masami nga harangon ukon i-harass it mga barko it China ro mga barko it Pilipinas nga nagapatigayon it resupply mission sa BRP Sierra Madre.
Ro madinaeag-on nga resupply mission hay ginakonekta sa provisional arrangement nga ginkasugtan it Pilipinas ag China ku Hulyo 2024.
