KALIBO, Aklan — Sa pihak it abiso it lokal nga gobyerno it Malay nga suspendido ro mga water sports activities ag bawae anay nga magpaligos sa baybayon it isla it Boracay tuga it tropical storm Hanna hay may una gihapon nga naga-eabag kara.
Raya hay kasunod it sangkiri nga pagka-eumos it sangka Chinese national nga nakilaeang si Ren Chunguang, 50, samtang nga nagapaligos sa baybayong sakop it Station 3, Barangay Manocmanoc sa nasambit nga isla.
Base sa paunang imbestigasyon it Malay Police Station, nataeupangdan sigon it lifeguard volunteer nga si Teddy Baylosis nga may nagapangayo it bulig rason nga insigida nana raya nga gin-agtunan ag nakita ro tatlong turistang nagaka-eumos.
Insigida sigon nana nga ginbira si Chunguang ag dayun nga nagpangayo it bulig sa iba pa nana nga kaibahan, apang sa andang pagbalik sa area hay owa eon ro daywa.
Sa makaron hay padayun nga ginatumod it pulisya kun naka-eowas baea ro daywang bakasyunista.
