KALIBO, Aklan—Kadungan sa pagselebrar it Adlaw it mga tagipusuon, magapatigayon it coastal clean-up drive nga may temang “Feb-ibig para sa Malay” sa long beach it Isla it Boracay.
Raya hay pagapangunahan it Malay Tourism Office base sa Municipal Ordinance No. 84 series of 1995 ukon Project Pristine.
Suno kay Malay Tourism Officer Felix delos Santos nga gusto nandang ipakita ro eubus nga pagpalangga sa kalikasan pati eon man ro pagkakaisa it mga pumueoyo sa pamaagi it paglimpyo sa binit baybayon may katuyuang padayon nga mapasanyog ro pag-amlig sa dunang manggad ag mabahinan ro pagpilak it basura kamana man matur-an ro publiko angot sa waste management.
Mag-eowas sa coastal ag underwater clean-up drive, makaangkon man it tree planting activity sa mainland Malay, kon sa siin magatanom it 75 seedlings bilang simbolo it ika-75 anibersaryo it pagkatukod it banwa it Malay.
Kadungan kara, gin-imbitahan it Malay Tourism Office ro tanan nga organisasyon, asosasyon, kooperatiba, ag mga establisimento nga makipagbahin sa andang aktibidad sa pag-amlig sa kaanyag it Boracay.
Samtang, ginpahayag pa ni delos Santos nga matapos ro selebrasyon it Chinese New Year, padayon ro pagbuhos it mga turista sa isla nga may average nga 5,000 hasta 6,000 kada adlaw.
