KALIBO, Aklan–Ginpahayag ni Aklan second district congressman Teodorico Haresco sa ginpatigayon nga press conference nga may benepisyo ro ginaduso nga Maharlika Investment Fund.
Raya hay matapos nga maabong pondo ro nakatiwangwang kon sa siin raya ro nakit-an it gobyerno nga pwede pang maging investment nga makabulig sa ekonomiya it nasyon.
Ginpaathag it kongresista nga posibleng magamit sa mga proyekto ro investment eabi eon ro mga pasilidad nga eubus nga kinahang-ean it publiko.
Kada dag-on suno kana hay milyon-milyon ro nakatiwangwang nga pondo sa ibang ahensya rason nga kinahang-ean raya nga iinvest agud nga magamit sa iba pang proyekto.
Nagapati si Haresco nga makabulig ro MIF sa pag-umwad it ekonomiya it nasyon sa mga masunod nga dinag-on.
Mag-eowas kara, nagta-o man it reaksyon ro kongresista sa kakueangan it storage facility sa nasyon para sa mga naani nga sibuyas ag engkaso nga makaangkon it importasyon kadungan sa anihan it mga mangunguma hay magabaha man ro supply kara.
Samtang sa pihak nga parte, ginpatpat man it kongresista ro pila ka mga laye nga anang ginduso sa kongreso partikular ro pagpataas sa sweldo it mga health workers bangud nga nakit-an ro andang dedikasyon sa trabaho sa tyempo it pandemya, pagkriar it intrepreneurship academy ag maabong iba pa.
