KALIBO, Aklan — Plano nga igapatawag it Sangguniang Bayan it Kalibo sa makaron nga domingo ro contractor ag project monitoring it Kalibo Public Market agud nga masayuran ro update sa ginapatigayon nga construction it nasambit nga tindahan.
Suno kay SB member Raymar Rebaldo nga sangka resolusyon ro gindihon ni Kalibo Vice Mayor Philip Yerro Kimpo nga nagatuyo nga masayuran ro kahimtangan it proyekto, sangka 3-storey building nga nagabalor it P300-million.
Pilang mga Kalibonhon suno kana ro nagpaabot kanda it andang pagkadismaya sa sobra kahinay nga trabaho sa pihak nga haeos sang dag-on eon ro nagtaliwan.
Gusto man it konseho nga makita ro floor plan it proyekto ag makaangkon it video presentation.
Kaibahan sa igapatawag hay ro project monitoring nga ginaeakipan it Municipal Engineering Office ag Municipal Economic Enterprise Development Office (MEEDO).
Sa pihak nga parte, ginpahayag pa ni SB Rebaldo nga nagsueat kanda si Mayor Juric Sucro nga nagapangayo extension sa pag-renta it eugta sa ginhimo nga relocation site nga ginpatindugan it temporaryo nga tindahan sa Kalibo Eastern Side Terminal sa San Lorenzo Drive sa Barangay Andagao.
Base sa ordinansa, ginapasugtan eamang ro LGU-Kalibo nga ipasarado ro kalye paagto sa nasambit nga temporaryo nga tindahan sa sueod it 450 days.
Naghinyu sigon ro alkalde nga makaangkon it extension umpisa September 6 hasta December 31 it makaron nga dag-on. Apang paga-istoryahan pa sigon raya it konseho.
Nagapati sanda nga sa sueod it ginapangayo nga palugit nga haeos tatlong buean hay indi basta-basta nga mapatapos ro tindahan ag makasaylo ro mga market vendors bangud sa mahinay nga construction.
Nakaangkon it groundbreaking ceremony ko March 30, 2023 ro proyekto, apang ginasugid nga ro relocation it mga vendors ro nagtuga it pagka-atrasar sa timeline it construction rason nga owa raya naka-eagas sa date of completion.
