KALIBO, Aklan—Mabahoe ro maibulig it Cardiopulmonary resuscitation (CPR) para masugpunan ro kabuhi it sangka persona nga gulping naga-collapse.
Suno kay Violence and Injury Program Coordinator Rowene Perucho it PHO-Aklan nga dapat sambilog sa kada myembro it pamilya hay antigo mag-apply it CPR.
Raya hay bangud posibleng mamatay ro sangka pasyente kung indi makapatigayon it pumping sa anang dughan.
Sa sueod man it 4 nga minuto hay pwede makaangkon it brain damage ag brain death kung mag-abot sa 6 hasta 10 nga minutos.
Ginpahayag dugang nga sa pagpatigayon it CPR hay dapat nga tandaan ro 5 C, raya ro check , call, cover, compress ag connect.
Una kinahangean nga i-check ro breathing nga makit-an kung nagapasaka panaog ro dughan it biktima.
Call ukon magtawag sa mga hotline numbers it MDRRMO ukon PDRRMO nga maeapit sa lugar.
Cover ukon magsuksok it goves ag Personal Protective Equipment (PPE’s).
Siguraduhon nga may suksok nga mask ag tabunan ro baba ag ilong it pasyente.
Mag-euhod sa may dughan it biktima ag mag-apply it 100- 120 beats per minutes sa anang breast bone nga may kadaeumon nga 2 to 2.5 inches.
Samtang sa pihak nga parte, ginpahayag ni Perrucho nga ro sin-o man hay pwedeng mag-request it training sa Provincial Health Office (PHO), Provincial Disaster Risk and Reduction Management Office (PDRRMO), Municipal Disaster Risk and Reduction Management Office (MDRRMO), Rural Health Unit (RHU) , Philippine Red Cross- Aklan , Philippine Heart Association.
