KALIBO, Aklan — Nagapadayun ro imbestigasyon it Bureau of Fire Protection (BFP) sa pagkasunog it 25 nga baeay sa Sitio Pinaungon, Barangay Balabag sa isla it Boracay.
Owa it nailistang namatay sa insidente, apang sambilog ro naninahan nga ginkilaeang si Dave Ong, empleyado it Municipal Disaster Risk Reduction and Management Office (MDRRMO)-Malay matapos tamaan it hose nozzle it sangka fire truck.
Suno kay Provincial Fire Marshall Fire Supt. Nazrudyn Cablayan nga kaabuan sa nasunog nga baeay hay himo sa light materials.
Haeos tanan sigon nga firemen halin sa BFP Boracay Fire Substation ag mga miyembro it Boracay Fire Rescue and Ambulance Volunteers hay nagbulig sa pagtapna it kaeayo bandang alas-6:11 it gabi-i it Huwebes.
Apang, nabudlayan sigon ro mga raya nga makasueod sa lugar bangud sa mataas ag makipot nga daean. Naging madasig man ro pagkalhit it kaeayo bangud sa mabaskog nga hangin.
Na-kontrol ro kaeayo bandang alas-6:32 ag gindeklarang fire out bandang alas-6:52 pm.
Ginatantiya nga P300,000 ro balor it gintupok nga propiyedad.
Ginatumod pa it mga bombero ro rason it sunog nga ginasugid nga naghalin sa baeay nga ginapanag-iyahan ni certain Angging Lagaday.
Apektado sa insidente ro pilang pamilya ag mga empleyado it nagkaeain-eain nga establisimento sa isla nga naga-istar sa pilang boarding houses nga nadaeahig sa sunog.
