KALIBO, Aklan—Ginpatawag eon it barangay council it Tambak, New Washington ro tag-ana it establisimento nga gin-eontaran it natabu nga rambol sa tunga it daywang grupo it mga kaeaeakin-an ko nagtaliwan nga adlaw it Domingo, kun sa siin ro video hay nag-viral sa social media.
Suno kay punong barangay Lucille Macario it nasambit nga lugar nga may pilang bayolasyon sanda nga nataeupangdan partikular sa operasyon it establisimento nga dapat hay hasta eamang it alas-10 it gabi-i, apang kaeabanan nga hanagob eon sanda nga nagasarado.
Mag-eowas kara, owa sigon it naka-duty sanda nga guwardiya.
Nasayuran nga bukon eamang it raya ro unang kahigayunan nga may natabu nga kinagamo sa lugar.
Kaeabanan nga mga eakot kara hay mga dayo sa lugar nga kon amat hay mga hilong eon kon naga-uli.
Samtang, depensa man it punong barangay nga daywang tanod eamang nanda ro naga-roving sa lugar ag bukon it sa tanan nga oras hay magbantay sa lugar.
Sa pihak nga parte, plano man nanda nga mag-obra it ordinansa nga ro business hours it mga talabahan ag iba pang café and bar sa lugar hay hasta it alas-10 eamang it gabi-i.
