KALIBO, Aklan – – – Kulong ro tatlong ka mga persona samtang daywa ro padayun nga gina bueong sa Provincial Hospital kasunod it rambol kabie sa Sitio Malopalo, Brgy. Magallanes, Nabas.
Base sa report, naga inuman ro mga imbolbado sa insidente nga sanday Arex ag Aron Dela Torre kaibahan si Johanes Colendres sa panimaeay it Dela Torre kat mag agi ro gina sakyan nga tricycle ni Julios Dela Cruz sakay ro anang mag ina ag si Romeo Torio.
Gina alegar nga nagpundo ro tricycle sa prente it baeay it mga Dela Torre ag nagtinupea sigon raya sa gate kamana man nga nagpang-insulto.
Bangud kara rason nga gumowa sigon si Arex Dela Torre agud kumprontahon si Dela Cruz apang, nagkainitan hasta sa nagtungki ro grupo ni Dela Torre ag Dela Cruz.
Gina sugid nga sa kasagsagan it gulo kat nag awat ro ama ni Arex nga si Agusto Dela Torre apang, gulpi eamang sigon nga may nag eabo kara.
Gina alegar nga may gulpi man nga nagpangbuno kay Arex.
Samtang, maabo man nga igu it pagbuno ro naangkon nanday Julios Dela Cruz ag Romeo Torio.
Naninahan man sanday Johanes Colendres ag Aron Dela Torre.
Nasayuran nga matapos gin padangat sa ospital ag gin deklarang OPD, gilayon nga gin presu kara sa Nabas PNP Station si Augusto Dela Torre kaibahan sanday Colendres ag Aron Dela Torre.
Sa makaron hay naga pabilin man nga gina bueong sa nasambitan nga ospital sanday Torio ag Dela Cruz.
Padayun man ro imbestigasyon it kapulisan may kaangtanan sa insidente.
