KALIBO, Aklan—Uman nga ginpaathag it Land Transportation Franchising and Regulatory Board ukon LTFRB nga ro daywang piso nga dugang sa pamasahe sa tradisyunal ag modernized jeepney hay para eamang sa succeeding first four kilometers it daeagan it behikulo.
Bangud kara, ginpahayag ni Atty. Jun Altura, spokesperson it LTFRB region VI nga inde eon kinahang-ean nga magpaguwa it bag-ong fare matrix ro ahensya kundi notice of fare increase eamang nga igapaskil sa tagsa nanda ka behikulo.
Ginpaathag dugang ni Altura nga minimum fare eamang ro gintaasan kon siin ro kopya it abiso hay pwede eon nga mabueo sa andang taeatapan.
Suno pa kana, ro syudad it Iloilo hay naimplementar eon ro dugang nga pamasahe rason nga ginaengganyo nana ro iba pang drivers and operators nga magbueo eon it notice sa andang opisina agud nga pormal eon man sandang makapataas it pamasahe.
Ro pagpataas it pamasahe sa pampublikong saeakyan hay sandig eon man sa hinyo it transport sector bangud eon man sa sigidas nga pagtinaas ko presyo it langis.
