KALIBO, AKLAN—Nag-abiso ro Department of Education ukon Deped-Aklan sa mga eskwelahan nga pabaskugon ro mga tikang agud nga malikawan ro pagkalhit it dengue ag iba pang sakit nga daea it namok makaron nga tag-uean.
Angot kara, nagpaguwa ro deped it memorandum nga nagamandu sa mga manugturo ag ginikanan nga pasuksukon ro mga unga it mga eambong nga may mahaba nga butkon, saewae ag mahaba nga medyas agud nga malikawan ro pagsugod it namok nga nagadaea it dengue nga kaeabanan nga naga-atake kada agahon kun sa siin ro mga inunga hay sa eskwelahan.
Suno kay Dr. Ruby Magdaluyo-Fernandez, medical officer 3 it Dep-ed Aklan nga bangud nga mga unga ro kaabuan nga nagakamatay sa dengue hay sigidas ro andang ginpatigayon nga school visitation.
Ginlaygay pa ni Dr. Fernandez sa mga ginikanan nga siguraduhon nga mabantayan ro ikamayad nga eawas it mga estudyanteng sa eskwelahan bangud nga makaron nga tag-uean, ginaeauman nga magataas pa ro kaso it dengue.
Ginlaygay man nana nga insigidang ipatan-aw sa doctor ro mga unga kon gina-eagnat it haeos daywang adlaw eon.
Gina-engganyo man nana sa mga school heads nga ayuson ro pagpilak it basura ag kon mahimo hay i-eubong raya sa eugta.
Malikawan suno kana ro dengue ag iba pang sakit nga tuga it namok kon pagasundon ro kampanya it DOH nga 4S.
