Kalibo Aklan——Ginpahayag ni Assistant School’s Division Superintendent Jose Niro Nillasca it Department of Education (DepEd-Aklan) nga 3 percent pa eamang ro naka-enroll sa Kinder Garten; 5 percent halin sa Grade 1 hasta it Grade 6; 5 percent man halin sa Grade 7 hasta it Grade 10; ag 7 percent halin sa Grade 11 hasta it Grade 12 ukon Senior High School.
Raya hay kasunod sa andang ginpatigayon nga remote enrollment sa mga pampublikong eskwelahan nga nag-umpisa ko Hunyo 1 hasta 15.
Ginpaathag nga ro mga manugturo it mga learners sa nagtaliwan nga school year ro nakipag-angot sa mga ginikanan pinaagi sa text, tawag ag messenger sa facebook.
Samtang, sa Hunyo 15 hasta it 30 hay para mat-a sa mga ginikanan nga owa it access sa internet ag cellphone nga ginatawag nga physical enrollment kon sa siin pagataw-an sanda it pormas nga enrollment ag survey form nga sarang mabo-oe sa mga Barangay Hall ukon sa mga eskwelahan it natungdan nga lugar.
Nasayuran nga mag-eowas sa online learning hay igapatuman man ro modular learning kamana man ro Radio ag TV based instructions.
