KALIBO, Aklan — “All systems go” eon ro Department of Education (DepEd) Western Visayas para sa pormal nga pag-umpisa it klase sa mga pampublikong eskwelahan sa Lunes, Hulyo 29.
Suno kay DepEd Region 6 spokesperson Hernani Escullar Jr., nga base sa andang pinaka-ulihing datos nga may petsang Hulyo 24, nag-abot eon sa kapin sa 1,284,918 ro nakapagpa-enroll sa mga pampublikong eskwelahan sa bilog nga rehiyon para sa school year 2024-2025.
Apang, ginaeauman nga magataas pa ro nasambit nga numero sa oras nga makompleto ro encoding it mga datos para sa enrollment.
Madumduman nga ko nagtaliwan nga school year hay nakalista it masobra sa 2 milyon nga enrollees.
Owa man sigon it mga eskwelahan nga nagpa-abiso nga igapaiway nanda ro pagbukas it klase nga naapektuhan it maeain nga paniempo.
Samtang, sangka regional memorandum man sigon ro ginpaguwa agud nga masiguro ro eowas nga pagbalik eskwela it mga estudyante partikular ro nakabaehag sa DepEd Child protection policy ag guidelines sa pagtau it masustansiyang mga pagkaon kamana man ro pagdumaea sa mga childrens at risk ag children in conflict with the law .
Ginmanduan man ro tanan nga 21 division offices nga nagasakop sa kabilugan nga 4,057 nga mga public schools nga makipag angot sa mga local law enforcement entities agud nga masiguro ro peace and order sa guwa it mga eskwelahan sa pagdagsa it mga learners.
Uman nga ginpadumdum it DepEd ro mga pampublikong eskwelahan nga hugut nga igapatuman ro ‘no collection policy’ kadungan it pagbukas it klase sa Lunes, Hulyo 29.
Suno kay Escullar nga ginapadumdum sa mga ginikanan ag mga school administrator nga ro basic public education sa nasyon hay libre ag owa it dapat nga bayaran.
Dugang pa nga may mga authorized apang voluntary fees, kun sa siin raya hay kinahangean pa nga baeayran sa ulihing mga binuean it school year.
