KALIBO, Aklan–Target it Department of Education ukon DepEd Region 6 nga maangkon ro kampeonato sa paeaabuton nga 2023 Palarong Pambansa nga iga-host it Marikina City umpisa Hulyo 29 hasta Agosto 5, 2023.
Suno kay DepEd region 6 spokesman Hernani Escullar Jr., nga ginatau sa mga atleta ro andang mga kinahangeanon agud nga mahugdan sanda sa pag-practice para sa ginahandum nga kampeonato ag makaangkon it mga bag-ong records.
Nasayuran nga napabilin it Western Visayas ro ikatlong pwesto sa 2017 hasta 2019 nga Palarong Pambansa.
Ko 2019 palarong pambansa antes ro pandemya hay nakalista it pitong records ro Region 6 sa nasambit nga sporting event.
Sa pihak nga parte, gindugang pa ni Escullar nga kabilugan nga 813 ro delegado it western visayas nga ginaeakipan it 539 nga atleta; 131 nga coaches, assistant coaches ag chaperones; kamana man ro 143 nga miyembro it technical working group.
Gusto nanda nga makahakot it maabu nga bueawan nga medalya bangud nga ro magadaog sa palaro makaron nga dag-on hay iga-ranggo base sa numero it mga gold medals nga natipon.
Makaangkon it 20 nga regular sports, ap-at nga para-games, ag daywang demonstration sports ro pagahiwaton sa maabot nga Palaro.
Dugang pa ni Escullar nga ro National Capital Region ag Calabarzon ro magiging hugut nanda nga kaengkwentru.
Magabiyahe sigon ro delegado halin sa Iloilo sa Hulyo 23 ag maga-stop-over sa Bacolod sa pagsueang sa iba pang delegasyon.
Tanan sigon nanda nga quarters hay nahamtang sa second floor it Kalumpang Elementary School, Kalumpang National High School ag Marikina Science High School nga puro tanan sa sangka compound bangud nga baeahaon ro lugar ag tag-uean makaron ro tiempo.
