Ginkumpirma it Department of Migrant Workers nga nag-eogdang eon ro MV Tutor kon sa siin ginapatihan nga naaywan ro missing Pilipinong tripulante matapos ro pag-atake it Houthi rebels sa nasambit nga cargo ship.
Suno kay Migrant Workers Sec. Hans Leo Cacdac, ulihing nakit-an ro barko ko Hunyo 17 nga naireport nga napadpad ag nag-eogdang sa eastern coast it Eritrea sa may Red Sea.
Ginpakigbahin it opisyal nga ko Hunyo 18 kat bumalik ro salvage team para magpatigayon it search ag salvaging operation sa MV Tutor, inde eon raya makit-an pa sa lugar.
May nakit-an man nga tumagas nga langis sa parehong ginatantyang lokasyon it nag-eogdang nga barko.
Bangud kara, padayon nga nakabantay ro Department of Migrant Workers angot sa posibleng pag-usoy sa missing nga tripulante kon may development sa mga masunod nga inadlaw.
Suno pa sa opisyal nga inde pa makumpirma sa makaron kon namatay ro nasambit nga Pilipino hasta sa uwa pa it ebidensiya.
Ginpasiguro it opisyal ro padayon nga pagtao it nagakaigong bulig para sa pamilya it missing Pinoy seafarer.
