Kalibo Aklan —Nagpaguwa it direktiba ro Department of Energy (DOE) ag Energy Regulatory Commission (ERC) sa mga power industry players nga magtau it grace period sa tanan nga electricity consumers sa bilog nga nasyon nga ro due date hay pumatak sa gindeklarang Enhanced Community Quarantine (ECQ) period.
Suno kay Aklan Electric Cooperative (AKELCO) General Manager Engr. Alexis Regalado nga base sa sueundanan, pagatunga-on ro baeayran sa ap-at nga parte ag pwede raya nga bayaran sa sueod it ap-at man nga buean .
Ginpahayag dugang nga umpisa makaron nga buean it Mayo hay gin-umpisahan eon ro pagpanupod it mga naka-pending nga mga power bills nga owa na-distribute ko buean it Marso bangud sa gulpiyadang pagsuspende it meter reading ag bill distribution umpisa Marso 28 hasta Abril 30, 2020.
Kaibahan kara ro kopya man it estimated bill hasta buean it Abril.
Sa oras suno kana nga mabaton ro inyong power bill hay insigidang tan-awon ro nakabutang nga due date.
Kon raya hay pumatak sa gindeklarang ECQ period hay pwede raya nga bayaran sa sueod it ap-at nga buean .
Ro unang parte it installment payment hay makita sa naubos nga parte it inyong power bill nga mabaton para sa buean it Mayo.
Ro unang installment hay makita sa Mayo nga billing, samtang ro 2nd installment hay sa June billing, ro 3rd installment hay makit-an sa July billing ag ro 4th installment hay maga-reflect sa August billing
Sa pihak nga parte, ro amortized power bills hay owa it dugang nga surcharges, interest ag penalidad, apang bangud nga raya hay installment, dapat raya nga mabayaran kadungan it inyong pagbayad sa magiging konsumo ninyo sa buean it Mayo, Hunyo, Hulyo ag Agosto.
Sa mga consumers it AKELCO nga may ikasarang nga bayaran eagi it bilog ro mga previous bills, raya hay nakadepende kinyo .
Samtang, sa mga nagabayad it electric bills hay medyu pahabaan sigon ro pasensiya bangud sa mahaba nga pila bilang pagsunod sa social distancing .
