Nagapangatubang sa mga reklamong kriminal ag administratibo si Department of Health (DOH) Secretary Teodoro Herbosa ag 16 nga iba pang opisyal it taeatapan matapos mabulgar ro gina-alegar nga pag-expire ag owa pag-deliver sa masobra sa P1.4 bilyong haega it mga bueong ag bakuna.
Ginpasaka it grupong Concerned Department of Health Personnel ro graft complaint sa Office of the Ombudsman, adlaw it Martes, Marso 31.
Suno sa reklamo, owa sigon napanupod it nasambit nga mga opisyal ro mga importanteng bueong, kaibahan ro mga HIV antiretrovirals, bueong sa sakit sa paminsaron ag bakuna, nga nagresulta sa pag-expire it mga raya sa mga bodega.
Kaibahan sigon sa mga nag-expire nga suplay nga nagabalor it P68 milyon hay ro family planning drugs ag psychiatric injectables; kaibahan ro P1.3 bilyong haega it mga bakunang owa na-deliver hasta ko Enero 2026; ag 1.6 milyon nga tableta it HIV antiretrovirals nga umabot sa “terminal status” samtang nagahueat it pirma it mga opisyal.
Ginbulgar man it grupo nga sa baylo nga maghimo it pamaagi para mapanupod ro mga bueong, ginmadali pa sigon it DOH ro pagpilak ukon disposal it mga raya.
Gintawag raya it mga complainant nga sangka “clandestine effort” para pagtakpan ro eskandalo ag likawan nga masayuran ag mausisa it media.
Mag-eowas kay Herbosa, kaibahan sa mga ginkasuhan ro mga undersecretary nga sanday Randy Escolango, Gloria Balboa ag 14 nga doktor ag opisyal. Nagapangatubang man sanda sa mga administratibong reklamo angot sa serious dishonesty, grave misconduct, and conduct prejudicial to the best interest of public service.
Ginhinyu it grupo sa Ombudsman nga insigidang papanaugan it preventive suspension ro mga ginareklamo agud nga indi makaimpluwensiya sa mga testigo ukon magpasilabot sa mga ebidensiya samtang nagapadayun ro imbestigasyon.
