KALIBO, Aklan—Arestado ro sangka 33-anyos nga eaeaki sa ginpatigayon nga buy bust operation sa may Barangay Camanci, Batan, Aklan ku Hulyo 1 mga alas-3 it hapon.
Suno kay P/Captain Gelbert Batiles, acting chief of police it Batan Municipal Police Station nga ginkilaea ro suspek nga si Melvin Napoles it Barangay Basiao, Ivisan, Capiz.
Suno kana, mabuhay eun gid nanda nga ginamonitor ro suspek sa anang illegal nga aktibidad kun sa siin nagguwa nga imaw ro supplier sa Batan ag Altavas nga halin pa sigon sa Roxas ro supply.
Dugang pa ni P/Capt. Batiles nga medyo nakahalata sigon ro suspek sa tunga it transaksiyon rason nga naghana nga magpaeagyo apang nakibot raya nga may nagasub’eang kana nga mga kapulisan ag ginpaharurot ro anang motorsiklo paadto sa nasambitan nga lugar kun siin imaw nadakpan.
Nabue’an ro suspek it 3 sachets it gina’alegar nga shabu nga may market value nga P24,000 ag transaction money nga P1,500.
Iga’inquest makaron nga adlaw si Napoles bangud nga ginahueat pa ro resulta it drug test maghalin sa crime laboratory ag pagapasakaan it nagakaigo nga kaso.
Nasayuran nga drug surrenderee ro nasambitan nga suspek sa Capiz apang uman nga nagbalik sa anang bisyo.
Samtang, padayon ro pagpadumdom ag apela it taeatapan it pulisya nga magpundo eun ro mga nagagamit ukon nagaduso it illegal nga droga bangud nga inde man gihapon raya makaeosot sa alagad it batas agud nga maproteksyunan ro mga inunga.
