Ginhugtan it Department of Social Welfare and Development (DSWD) ro sueondanan sa pagtao it ₱5,000 cash aid matapos nga ginatos ka tricycle driver ro uwa nakabaton sa unang rollout it programa.
Ginklaro it ahensya nga mga driver eamang ro kwalipikadong benepisyaryo ag bukon it ro mga operator mag-eowas kon ro operator hay imaw man ro aktwal nga nagamaneho ag may beripikasyon halin sa lokal nga gobyerno.
Nagguwa sa rollout ko Abril 8 nga may mga saea sa listahang ginsumite it LGUs, kon sa siin pilang operator ro naieakip imbes nga mga driver, rason nga may mga lehitimong benepisyaryo ro uwa nataw-an it ayuda.
Suno sa DSWD, ro LGUs ro nagapahaom it listahan samtang sanda mat-a ro nagapatigayon it beripikasyon ag pagpanupod it bulig.
Paandam it ahensya, inde makabaton it ayuda ro mga una sa listahan nga mapamatud-ang operator ag bukon it driver sa adlaw it payout.
Ginlaygayan man ro mga driver nga uwa nakaibahan sa listahan nga makipag-angot sa andang TODA ag LGU agud makabuoe it sertipikasyon ag maipasa ro andang pangaean sa DSWD.
Makaangkon it special payout para sa mga uwa nakabaton sa unang bugso it distribusyon.
Sa datos it DSWD region VI, 8,021 sa 8,450 target beneficiaries ro nakabaton eon it ayuda, katumbas it ₱40.1 milyon, samtang 429 nga driver pa ro ginaeauman nga mataw-an sa masunod nga payout schedule.
