KALIBO, Aklan — Naka-alerto ro Department of Social Welfare and Development (DSWD) Region 6 para sa pagpanaeasa it Habagat nga ginpabaskog it Super Typhoon Nando.
Sa interview it Bombo Radyo, ginpahayag ni Therese Fely Legaste, Regional Information Officer it DSWD Region 6, nakapahaum eon ro andang 111,165 nga food packs sa bilog nga rehiyon para sa mga maaapektuhan nga komunidad .
Naka-preposition eon suno kana ro mga food packs sa nagkaeain-eain nga LGUs sa Western Visayas ag iba pang mga warehouses nanda.
Sa probinsiya it Aklan hay may gintaeana sanda nga 5,362 nga food packs.
Mas maabu ro andang gin-allocate nga food packs sa Antique bangud sa ginaeauman nga eubus nga maapektuhan it Habagat ro mga residente nga naga-istar maeapit sa coastal areas sa nasambit nga lugar.
Target sigon nanda nga masiguro nga ro bulig hay maka-abot sa mga tawo sa mas madali nga paniempo.
Dugang pa nga gin-abisuhan nanda ro mga partner LGUs sa rehiyon nga makipag-angot sa natungdan nga mga DSWD offices para sa posibleng request it dugang nga bulig.
Mag-eowas sa food packs, may nakapahaum man sanda nga mga non-food items ag standby funds nga nagabalor tanan it masobra sa P116.3 milyon.
Sa pihak nga parte, nakapanupod man sigon sanda it food packs ag non-food items sa mga residenteng naapektuhan it nagtaliwan nga Tropical Depression Mirasol.
Nauna eon nga ginpahayag it state weather bureau nga ro bagyo hay posibleng magguwa sa Philippine area of responsibility udtro adlaw ukon hapon it Martes, Setyembre 23.
