KALIBO, Aklan—Nagpaguwa it guidelines ro Department of Trade and Industry sa mga barbershops ag salon nga nagbukas umpisa ko Hunyo 1 kadungan sa pagbutang sa bilog nga probinsya it Aklan sa modified general community quarantine ukon MGCQ.
Suno kay DTI Aklan provincial director Ma. Carmen Ituralde, kinahang-ean nga ipaskil sa mga madaling makita sa sueod it establisyimento ro mga padumdom kaparehas sa mandatory nga pagsuksok it facemasks, pagpatuman it physical ag social distancing kamana man kinahang-ean ro mga raya nga magpatigayon it regular sanitation.
Ginaengganyo man ro mga tag-iya nga magpatuman it “appointment system” kasunod it kinahang-ean nga 50 porsyento eamang ro pwede nanda nga mapasueod eabi eon kon maisot malang ro espasyo it salon ag barber shop.
Ginpahayag dugang ni Ituralde nga kinahang-ean man sandang magbutang it foot bath nga may disinfectant, gumamit it thermal scanner para sa pagbueo it body temperature it andang mga customer kamana man obligado sanda nga magprovide it alcohol sa mga nagasueod it establisyimento.
Samtang, ro SPA, waxing service, manicure, pedicure, massage, threading hay ginabawaean gihapon bangud sa mahabang oras it physical contact.
Ro mga inde magsunod sa guidelines hay posibleng igapasara it DTI.
