Padayon nga nagapanawagan ro mga labor group sa Western Visayas it P250 dugang sa minimum nga sweldo kadungan it pagpadayon it pagpamati ag konsultasyon it Regional Tripartite Wages and Productivity Board (RTWPB) angot it mga petisyon para sa wage increase.
Suno kay Mario Andon, tagapaghambae it United Labor – Panay, ginkakibot nanda ro uwa pag-baton it RTWPB sa andang unang petisyon bangud sigon sa kakueangan it legal nga personalidad bilang sangka rehistradong organisasyon.
Bangud kara, nagsumite it magka-separado nga petisyon ro nagkaeain-eain nga unyon halin sa sektor it ospital, BPO ag iba pang industriya agud masueong ro proposisyong umento sa sweldo.
Dugang pa kara, nagpatigayon man sigon it konsultasyon ro RTWPB kaibahan ro mga representante it mga unyon ag nagkaeain-eain nga ahensya it gobyerno para talakayon ro mga petisyon.
Sa presentasyon it datos, ginpamilit it mga labor group nga bukon eon it bastante ro presenteng minimum wage para masolusyunan ro naga-taas nga gaeastuson sa pagkaon ag iba pang nagapangunang kinahangeanon.
Ginpamilit man nanda nga ginahinyo nga P250 umento hay makabulig para nga mahagan-haganan ro epekto it padayon nga pagtaas it presyo it mga baeakeon ag mapabilin ro bastante nga lebel it pagpangabuhi it mga minimum wage earners sa rehiyon.
Sa makaron, ginahuwat lang sigon ro desisyon it RTWPB matapos ro serye it konsultasyon sa tunga it mga representante it labor ag management angot sa nasambit nga proposisyon.
