NEWS Analysis– Maskin nga manami nga balita para sa mga trabahador ro naaprubahang dugang sa minimum wage sa National Capital Region (NCR), aminado ro mga raya nga manaba ro P40 nga umento.
Nauna eon nga gin anunsyo it Department of Labor and Employment (DOLE) nga gin-aprubahan it NCR Regional Tripartite Wages and Productivity Board ro panibag-ong dugang nga sweldo kun sa siin halin sa P570 pesos, hay magiging P610 pesos eon ro daily wage para sa non-agricultural sector, samtang magiging P573 pesos man ro daily wage para sa agricultural sector.
Kaibahan sa mga naging reaksyon hay bitin sigon ro P40 pesos nga umento sa pagtaas it presyo it mga baeak-eon makaron.
Sa kanaba sigon it gindugang, haeos indi man sigon raya mabatyagan.
May mga grupo it trabahador nga ginakabig nga insulto ro desisyon bangud sa haba it paghueat hay sangkiri man lang ro gintau.
Nagaeaum man ro mga trabahador nga insigidang magasunod ro andang mga employer sa ginpatuman nga umento sa minimum wage.
Magiging epektibo ro dugang nga sweldo umpisa sa Hulyo 16, 2023.
Samtang, sa parte man it mga employer, kapareho man sigon sanda it mga trabahador nga nabudlayan man bangud sa epekto it pandemya.
May mga negosyo nga owa pa eubusan nga nakakabangon ag kon indi masarangan ro pagtau it umento sa mga empleyado, puwedeng bumawi sa presyo sa produkto ukon serbisyo nga publiko man ro magasaeap ukon di hay magabawas it tawo, hasta nga eubusan nga magsarado.
Ro makarondaya nga senaryo ro sambilog sa mga ginataw-an it konsiderasyon sa pagpatuman it pagpataas it sweldo dapat nga balanse.
Kun magiging mas mahugod eang kunta ro gobyerno sa pagsukoe sa kapigaduhon ag mas maisog sa mga korup ag nagapanabotahe sa ekonomiya, maayos kunta ro daeagan it nasyon , mabuhay eon kunta kita nga nakabawi sa pandemya.
