KALIBO, Aklan — Sa kaabuon it mga tawong bumuhos, nakakolekta it kapin sa 310 bags it dugo sa dag-unang Dugong Bombo sa ABL Sports and Cultural Complex, Capitol Site, Kalibo, Aklan.
Mag-eowas sa mga suking tagpaeamarti it Bombo Kalibo, ginsuportahan man ko mga myembro it Philippine National Police, Armed Forces of the Philippines, leftist group ag iba pang government ag non-government organizations ro blood letting activity.
Ginpaathag ni Philippine Red Cross (PRC)-Aklan chapter OIC Mary Jo Galeon nga pila sa mga benepisyo ko pag-donate it dugo hay ro kalipay nga makaeowas it kabuhi it tatlo hasta ap-at nga katawo, libreng medical check-up, pagtunaw it calories, pagnaba it tiyansang makaangkon it cancer ag sakit sa puso.
Para man kay Mr. Ronel Irodistan, sangka mamamahayag nga maabong beses eon nga nag-donate it dugo nga mag-eowas sa manaming benepisyo kara sa anang eawas, makasugpon pa imaw it kabuhi sa mga nagakinahang-ean.
Ro mga successful blood donors hay gintaw-an it souvenir shirts, snacks ag blood donor card.
