MALINAO, Aklan – Sangka eaeaki ro ginbuno it makapilang beses matapos nga gusto eon kunta kara nga sukton ro suspek bandang alas-9:30 it agahon it Miyerkules sa Barangay Bulabud, Malinao.
Patay ro biktimang si Sherwin Retiro sa legal nga edad ag residente it Brgy. Rosario, Malinao bangud sa tama it pagbuno sa nagkaeain-eain nga parte it anang eawas partikular sa anang dughan.
Sa kustodiya eon man it kapulisan ro suspek nga nakilaea kay Dandy Opeñano, 39-anyos ag residente it nasambit nga barangay matapos nga isurender it barangay kagawad it kinalangay Viejo, Malinao.
Base sa report it Malinao Municipal Police Station, antes nga natabu ro krimen hay nag-agto ro biktima sa Barangay Hall agud nga magpangayo it bulig sa mga barangay official idtu agud nga masukot ro suspek sa anang balanse nga P2,000 nga danyos perwisyos sa pagpabueong sa anang unga nga ginasugid nga ginbayo it suspek.
Sangka kagawad ro nag-agto sa baeay it tiya it suspek agud nga ipaabot nga kinahangean eon magbayad it anang utang.
Natiempo sigon nga idtu ro suspek sa baeay it anang tiya nga nagapamanday.
Bangud sa kaakig, gulpi raya nga nag-uli sa andang baeay ag nagbo-oe it siyaw ag sinalakay ro biktima sa Barangay Hall.
Ginasugid nga pagkakita it suspek sa biktima hay owa it anupaman nga hambae ag ginbuno nana it lima hasta an-um nga beses ro biktima.
Kat makitang duguan eon ro biktima hay madasig nga nagpaeagiw ro suspek sakay it sangka motorsiklo.
Nahimo pa sigon nga makadaeagan it biktima paguwa it barangay hall, apang natumba raya ko ulihi ag ginkabuligan it mga residente nga isakay sa tricycle agud kunta nga daehon sa ospital.
Gintransfer raya sa ambulansiya it MDRRMO-Malinao, apang patay eon kat maka-abot sa aklan provincial hospital.
Nasayuran nga ko nagtaliwan nga Hunyo 9 hay nag-atubang ro magtimbang nga parte sa barangay hall para sa sangka settlement matapos nga ginbayo it suspek ro unga it biktima may daywang domingo eon ro nagtaliwan.
Nadakpan sigon sa akto it suspek ro anang unga nga babaye nga kaibahan ro unga nga eaeaki it biktima sa dis-oras it gabi-i nga sa sobrang kaakig hay nabayo nana.
Ginpabueong it biktima ro anang unga kun sa siin nag abot sa P2,283 ro andang nagastos.
Ginsabat it barangay kapitan ag sangka kagawad ro sawad nga 283 pesos kun sa siin ginpromisa it suspek nga pagabayaran ro balanse pag-abot it kwarta halin sa 4Ps.
Ginasugid nga nagastos ro kwarta ag owa nabayaran ro biktima nga ginkaakig kara.
Kasong murder ro igapasaka kontra sa suspek.
