Eaeaki sa Mexico nakabaton it  2 guinness bangud sa pagtindog it nakabaliktad gamit ro sangka alima

Sangka  Mexican acrobat ro nakaangkon it daywang Guinness World Record title  bangud sa ikasarang nana nga magbalanse  it naka­baligtad gamit ro sangka alima.

Ginkumpirma   it  Guinness nga napasa alima eon ni Nicolas Montes de Oca ro bag-ong world record title nga “Longest duration to perform a single arm handstand (male)” matapos nga nagbuhay it  71.82 seconds samtang naka-handstand gamit eamang ro sambilog nga alima.

Ro previous record holder  it nasambit nga  titulo hay si Stanislav Scherbakov it Russia nga nakabuhay eamang it  59.23 seconds.

Ro ikaywang world record title nga nabaton  ni Montes de Oca hay “Longest duration to perform a handstand on a rotating platform (male)”.

Nagbuhay imaw nga naka-handstand sa nagatiyog nga maisot  nga entablado sa sueod it  25.78 seconds.

Nag-umpisa si Montes de Oca bilang juggler sa sangka circus school.

Apang mas  ginpili nana nga  tun-an ro mga handstand routines matapos makaangkon it  injury sa siki.