BALITANG Espesyal — Sangka 39-anyos nga eaeaki sa Vietnam ro gina-istoryahan it Vietnamese netizens bangud sa anang obsesyon sa bueawan.
Daywang kilo it bueawan nga alahas ro suksok nana adlaw adlaw ag pati ro anang mga saeakyan hay gold plated!
Ro eaeaki hay si Tran Duc Loi, sangka businessman halin sa An Giang province.
Naging viral ro anang mga TikTok videos ag naging instant influencer imaw sa anang lugar bangud sa pagsuksok it daywang kilong bueawan nga alahas kada nagaguwa sa baeay.
Nagapati imaw nga kon palibutan nana it bueawan ro anang kaugalingon hay maka-attract raya it suwerte ag sa anang business.
May pet shop si Tran ag sa tan-aw nana hay nakabulig ro pagsuksok nana it bueawan sa pagtuhaw it anang negosyo.
Makita sa anang mga TikTok videos ro 250 gram gold necklace nga korteng dragon, 10 gold nga singsing, sangka madamoe nga pulseras ag gold plated nga relo.
Mag-eowas kara, may una man imaw nga gold plated Lexus convertible ag daywang bueawan nga motorsiklo.
Maabu nga TikTok followers si Tran nga nagadayaw sa anang lifestyle apang maabu man ro nagabatikos kana bangud sa tan-aw it iba, bukon it mayad nga halimbawa sa pamatan-on ro pagpakita sa publiko it sobra-sobrang kabuganaan eabi eon ag tiempo makaron it pandemya nga maabu ro nagakalisod.
Apang suno kay Tran, bukon it pagbinugae ro tuyo nana sa pag-post it TikTok videos.
Gusto eamang nana nga maging inspirasyon sa iba ag ipakita nga bueawan ro pwedeng maangkon sa pagtinguha sa kabuhi .
