KALIBO, Aklan—Paga-umpisahan makaron nga adlaw it Sabado, Agosto 20, 2022 ro assessment ag releasing it bulig pinansiyal sa mga pigado nga estudyante halin sa Department of Social Welfare and Development (DSWD) nga pwede nanda nga magamit makaron nga bukas it klase.
Suno kay Atty. May Rago Castillo, tagapaghambae it DSWD-region 6 nga mas mayad sa mga aplikante nga mag-email anay sa andang extension office sa Kalibo ukon magtawag para sa dugang nga impormasyon kamana man ro appointment pinaagi sa internet.
Ro mga pigado nga estudyante sa elementarya hay pagataw-an it P1,000; P2,000 sa high school, P3,000 sa Senior High School ag P4,000 sa mga una sa kolehiyo ukon vocational school.
Hasta sa tatlong estudyante eamang sa sangka pamilya ro makabaton it cash assistance.
Magabuhay it an-um nga Sabado ro programa ukon hasta sa Setyembre 24.
Ro programa sigon hay nakabaehag sa idaeum it Assistance for Individual in Crisis Situation nga sang beses eamang nga ginatau.
Ro DSWD hay nagtaeana it kapin sa P500 milyon nga pondo para sa mga pigado nga estudyante.
Nakadepende suno kana sa assessment it mga social worker kon maka-avail kara ro mga miyembro it 4Ps.
Kinahangean nga magpakita ro mga aplikante it enrollment certificate ag valid school ID nga bukon it expired.
Indi eon sigon kinahangean it sertipikasyon it barangay nga nagapamatuod nga halin sa pigado nga pamilya ro estudyante.
Padayun man sigon ro andang pag-usoy it mabahoe nga lugar para sa releasing ukon pay-out sa mga mapili nga benepisyaryo.
